Par Dumenicantone GERONIMI
Briscula , brisculò !
Hè di radu di truvà una parsona anziana, o un omu maturu ch'ellu sia, o puru una donna à tempu fatta, ch'elli ùn vi aghjanu da cuntà quant'elli ne facianu da zitelli in tempu di quand'elli eranu criaturi o ancu belli più ingrandati : à tanziunà quellu chi facia vede à pena u debbule, à fà i sgherzi à e parsone maiò quand'ellu si pudia, à fraschià par issi chjosi di nottetempu à pressu à e parsiche pilufose o à cuttighjà e prima caspe à tempu messe à bracanà; andà à i nidi par isse machje, corre à pelu in le sarre i sumeri mullati, tirà à l'acelli di sfrombula è s'ellu ùn ci era acelli e pitrate à e ghjalline, à i lumi di u paese è ancu à quellu vetru di purtellu da u piacè di sente u schjapuline; salle si à i chjirasgi, saltà in le calanche, tirà si da una sciappa à quill'altra in lu fiume, ghjucà à a bracciuta, fà si una cazzuttata, èc. èc….vene à dì u spassu di e criature è di i zavardoni di tandu, in lu mondu di tandu, cù e sicarette à pedu à i pulloni, à u pe' di e ripe o in le cacciare. È po i ghjochi piatti di tandu è di sempre.
È puru, dopu vantadusi di isse zitillinate, i più di isse parsone trovanu à dì pà u mininu sciarpellu di i zitelli d'oghje causa d'ùn esse più zitelli è d'ùn capisce u piacè di i ghjoculi è di i ghjochi di u mondu d'avà : u zitillone chì face arcipisà a so mottò ùn hè micca peghju cà quellu chì curria l'ore è l'ore u sumere scurpatu ch'ùn avia avutu pruvenda. I ghjochi piatti sò belli più palesi ma, ancu asai, ùn sò micca una cosa nova in tuttu.
Allora cascarà ch'ellu sia bè tuttu è ch'ellu si possa accittà ogni cosa di cum'elle si portanu e leve nove avà ? Mancu à pena ! Pigliemu dui paragoni. Fà arcipisà à mottò hè una, viaghjà à lumi spenti à posta, di notte, à trunchera di collu in piena citai hè un antru par di brache! Da scurruzulà u dopumeziornu in la machja, o in piazza dopu cena, à esse mullati è ghjunghje in casa a mane à l'aba, finch'ellu si hè sempre tinnaroni ùn hè micca un contu ch'ellu venga ad unu.
À issa manera, tante volte, si ghjoca omu a so vita scimiscamente à briscula brisculò… quant'è à ghjuchittà. A soia è quella di l'altri.
Tandu pinsemu chì i sgavizzi ch'elli sò sempre asistuti è ch'elli ùn sò micca peghju oghje i zitelli è i giovani cà quelli di prima, ch'ella hè parsa sempre à e parsone anziane o mature ch'ellu fussi megliu u mondu di quand'elli eranu zitelli elli, ch'ellu hè sempre statu, è ch'ella durga, un fattu di zitillina di mette si à l'irrisicu, ma ch'ellu hè duvere pà e parsone maiò, cù l'allevu, di dà a crianza è d'amparà u calateu à e leve nove.
Oramai ci po ancu vulè à fà la, pocu quant'ellu si pò, ma bastarà à ficcà prighjò une poche di criature di tredici anni par irrimpattà i duveri ch'ùn sò stati fatti micca, o sippuru pocu, da quelli chì l'avianu da fà?06.X.02
[Les Unes] [La Une d' OCTOBRE 2002] [ Sommaire]