Cum'è vo ne site stati infurmati, U Teatrinu, Mariano Corda
(Cagliari) è tutti l'amichi chì travaglianu à a messa in scena
di una Passione. Un drama di Antonio Arca (Alghero) sò in
stu mumentu in Furiani à u Teatru. U so travagliu ghjunghjerà
à cunclusione ghjovi chì vene 12 di aprile. L'appuntamentu
hè per 21 ore.
Ùn sarete micca dillusi di u spettaculu chì, malgradu u tempu
cortu è i mezi pochi, ciò chì a cumpagnia hà purtatu in scena
hè attu à ammasgiulà è à fà crede veru ciò chì hè rapresentatu.
Ciò chì hè rapresentatu ?
|
In primu locu una storia chì si svolge in l'epica di a Passione, tempi
passatoni, à l'Età di Mezu, in una cità di u Mediterraneu, cù i so
marcanti, e so serve, u so maercatu, i so sgiucarelli è i so guai.
Entre u medicu. Ebreiu. Furesteru. Hà studiatu tutti i sapè di u so
tempu. Un umanistu chì hà sudiatu in e facultà più famose di u Mondu
Mediterraneu di l'epica. Ma ebreiu, chì pè u mondu cristianu è catolicu,
si porta a colpa di a morte di Ghjesù. Cum'è tutti l'Ebrei.
Culpevule da l'iniziu. A vittima, puntu è basta. Basterà à truvà a
scusa. U solu puntu incertu hè cum'ellu sarà cundannatu, chì pè u
restu a so sorte hè signata.
Galana, a figliola di u marcante, scelta per fà a Madonna durante
a Sacra Rapresentazione hè troppu alegra, troppu in vita. Ghjuchera
megliu a so parte s'ella hè sbiadita, inchieta, malata.Ùn hè faciule
à fà si Mater Dolorosa quandu si hè zitella è in salute bona, di mente
è di persona. Ci pensanu u dugmatisimu è i fanatichi di a Chjesa.
Galana si hè ammalata, Galana hà da more. Ghjunghje u medicu è a guarisce.
Perchè chì hè medicu è duttore è chì cura i malati. Un scentificu
diceriamu oghje, pocu attente à a religione di quellu chì soffre,
ma attentissimu à a suffrenza...
Ma a fola ùn hè tuttu. U drama hè di quelli ch'omu ricunnosce chì
e seguenze, i fatti, i persunagi, l'idee, i sentimenti spressi sò
di quì è d'altrò, d'issi tempi landani, ma d'oghje è d'ogni locu.
U testu hè bellu, semplice, direttu. U più posa nantu à e risolse
di u dramaticu. Un spettaculu zeppu, un'ora di tempu, ritimata da
una musica suggestiva di Claudio Sanna (Alghero) è i canti belli,
di Corsica è di Sardegna. L'attori parlanu corsu, talianu è sardu
è issu chjama è rispondi linguisticu custruisce un'architettura parullaghja
chì creanu un linguaghju dramaticu particulare. U spettatore si maraviglia
di u passa è veni culturale trà voce ch'omu cridia spiccate è spessu
straniere una cun l'altra. L'impressione hè altra, affascinante, trà
sumiglia è dissumiglianza un ghjocu suttile, ma chì cunvince è chì
piace.
Tutti l'attori si sò messi à l'opera cù primura è u so piacè si sente,
si vede. Vi aspettanu. U spettaculu prumette di esse bellu.
Ùn lu mancate chì ci sarà una sola rapresentazione.
Merci à Jacques Thiers .
|
